News

mayo 22 2018

Enpresek Enkarterriko eskualdearekin duten gizarte erantzukizuna aitortu du Enkarterrik

Enpleguko eta Gizarte Politiketako sailburuak adierazi du lanpostu berrietara egokitzeko gaitasuna dela lan-bilaketan arrakasta izateko oinarria

 

Hizlariak, ezkerretik eskuinera: Jesús Navas, Vicinay Cadenas; Mikel Pulgarín, moderatzailea; Beatriz Artolazabal, Eusko Jaurlaritzako Enpleguko eta Gizarte Politiketako sailburua; Esther Lasa, Enkarterriko mankomunitateburua; Andoni García, Enkarterri Groupeko burua; Dorleta Ugarte, CaixaBank; Mikel Huizi, Zabalgarbi; eta José Miguel Aranzabal, Cantera Lacilla.

 

“Enkarterri Gosariak” ekimenaren zortzigarren edizioa egin da Artzentalesko (Bizkaia) Amalurra hotelean, asteazkenean. Foro horrek Enkarterriko enpresariak eta erakundeetako ordezkariak biltzen ditu. Topaketaren izenburua “Enpresen gizarte-erantzukizuna, enplegagarritasuna eta eskualdearen garapena” izan da; bertan, tokiko enpresek inguruan duten lurraldearen gizarte-garapenarekiko duten konpromisoari buruz hitz egin dute. Halaber, ekitaldi horretan bertan “Enkarterri Green Enpresen Gizarte Erantzukizun Eredua” ziurtagiria eman zaie eskualdeko hamaika enpresari.

 

Edizio honetako hizlari gonbidatua Beatriz Artolazabal izan da, Eusko Jaurlaritzako Enpleguko eta Gizarte Politiketako sailburua. Artolazabal andreak euskal eredua goretsi du enpresaren irabaziak gizartera itzultzeko eredu gisa. Bere hitzetan, hori egitea “Euskadiren DNAn dago”. Horrez gain, Enkarterriko Mankomunitateko buru Esther Lasa eta Enkarterri Groupeko buru Andoni García ere gosarian egon dira.

 

Ekitaldian, gizarte-erantzukizun korporatibo sendoa duten enpresen hainbat arrakasta-kasu azaldu dira. Era horretan, gosarian parte hartu dutenek bertatik bertara ezagutu ahal izan dituzte honako kasu hauek: Lacilla Harrobia, 1969tik Sopuertako Lacilla auzoko meategi-baliabideak ustiatzeaz arduratu den sozietatea; Caixabank eta, bereziki, Euskadi-Kantabriako lurralde-zuzendaritza, zeinaren bidez banku-erakundeak Euskadin zuen egitura sendotu baitzuen; Vicinay Cadenas, 200 urte baino gehiago dituen eta itsasontzi nahiz petrolio-plataformetarako kateak eta aingurak egiten dituen familia-enpresa; eta Zabalgarbi, Bizkaiko hondakinen balorizazio energetikorako fabrika.

 

Enpleguko eta Gizarte Politiketako sailburuak etengabeko prestakuntzaren garrantzia nabarmendu du, baita pertsonek enpresek behar dituzten lanpostu berrietara egokitzeko gaitasuna izatearen garrantzia ere; esan duenez, gaitasun hori da lan-bilaketa baldintzatuko duen “arrakastaren oinarria”. “Ondo ulertzen bada, malgutasun hori” izango da gaurtik 2020ra euskal enpresek bete beharko dituzten 100.000 lanpostuetako bat eskuratzeko gakoa. “Egunero ahalegindu behar dugu egokitzen”, azpimarratu du berriz ere.

 

Halaber, Artolazabal baikor agertu da Euskadiren egoerari buruz hitz egitean. Euskal ekonomiak hazkunde jasangarriaren tasa positiboak ditu; hori dela eta, bere ustez, lehendik ditugun proiektuak sendotzeko eta etorkizunera begirako ekimenak abiarazteko une egokia da. Ildo horretatik, Eusko Jaurlaritzak azpiegituretan inbertitzeko modu berrien alde egin duen apustua nabarmendu du; inbertsio horiek lehentasuna ematen diote errehabilitazioari, iraunkortasunari eta energia-eraginkortasunari. Hori bizigarri garrantzitsua izan da eraikuntzaren sektorerako, krisi ekonomikoak gogor zigortu baitu. Horrez gain, adierazi du enplegu-politika aktiboak abiaraziko direla emakumeentzat, epe luzeko langabeentzat eta 45 urtetik gorako pertsonentzat. Eskualdeari dagokionez, adierazi du laster Lanbideren bulego mugikor bat jarriko dutela, Enkarterriko hainbat udalerriri zerbitzu emateko.

 

Familia-argazkia: hizlariak eta gizarte-erantzukizunaren ziurtagiria jaso duten enpresak.

 

Sailburuaren hitzaldiaren ondoren, “Enkarterri Green Enpresen Gizarte Erantzukizun Eredua” ziurtagiriak banatu dituzte; eskualdeko hamaika enpresak eskuratu dute ziurtagiria. Enpresa iraunkorren kalitatea aitortzen duen ziurtagiria da; horren bidez, iraunkortasunaren hainbat arlotan (gizarte-arloa, ingurumen-arloa eta ekonomia-arloa) hainbat betekizun betetzen dituzten enpresak saritu nahi dira, eta haien kalitatea are gehiago hobetzeko aukera eman. Proiektu handinahi eta berritzaile horretan Enkarterri Groupeko kide diren 11 enpresa pilotuk parte hartu dute jada; helburua da ekitaldi hau bukatu baino lehen 30 enpresa izatea.

 

HONAKO HAUEK DIRA ENPRESEN ERANTZUKIZUN SOZIALAREN ZIGILUA JASO DUTEN ENPRESAK: Grupo Lacilla (Cantera Lacilla eta Hormigones Sopuerta, Laenk Servicios Empresariales, CB System Oil, Serenerget, Grupo Urbegi, Asebrok, Fepsa, Depurfiltech, GnG eta Amalurra Ostatua).

 

Gosariak Enkarterri Greenen ekimena dira; Enkarterri Green Enkarterriko udalek, enpresariek eta gizarteko nahiz ekonomiako eragileek sustatutako gizarte-, enpresa- eta erakunde-mugimendu bat da, ekimen publiko eta pribatuak sustatua, eskualdearen garapen ekonomikoa indartzeko. Horren bitartez, trakzio-proiektuak erakarri nahi dira, eskualdean ekonomia-jarduera, enplegua eta ongizatea sortzeko.